Hlöðver Sigurðsson gekk til liðs við
Kammerkórinn vorið 2007 og syngur jafnframt með kirkjukór Bústaðakirkju. Hann
er fæddur og uppalin á Siglufirði. Þar kynntist hann tónlistarstjóra
Bústaðakirkju Renötu Ivan en hún var um nokkurra ára skeið organisti á
Siglufirði og Hlöðver kom margsinnsi fram með henni og söng þegar hann var
staddur á landinu. Á unglingsárunum stundaði hann nám á trompet við
Tónlistarskóla Siglufjarðar og tók svo upp þráðinn að nýju við tónlistarnámið
árið 1996 þegar hann hóf söngnám hjá Antoníu Hevesi. Hlöðver lauk 8. stigs
prófi frá Tónlistarskóla Siglufjarðar í apríl árið 2001. Veturinn 2001-2002
stundaði Hlöðver framhaldsnám við Guildhall School of Music and Drama í London,
þar sem aðalkennari hans var prof. Rudolf Piernay. Frá árinu 2002-2006
stundaði Hlöðver nám við Mozarteum tónlistarháskólann í Salzburg Austurríki þar
sem aðalkennari hans var prof. Martha Sharp. Hlöðver var einnig í Ljóða
og Oratoriudeild skólans þar sem hann naut leiðsagnar prof. Wolfgang Holzmair.
Hlöðver stundar núna einkanám hjá Kristjáni Jóhannssyni Tenór á Ítalíu.
Helstu hlutverk Hlöðvers eru Don Ottavio (Don Giovanni), Belfiore (La finta
giardiniera), Basilio og Don Curzio (Le nozze di Figaro), Bastien (Bastien und
Bastienne), Monsieur Vogelsang (Der Schauspieldirektor) allt Óperur eftir
Mozart, einnig Ernesto (Don Pasquale) eftir Donizetti og Alfredo (La Traviata)
eftir Verdi.Hlöðver hefur tekið þátt í fjölmörgum tónleikum og haldið
einsöngstónleika heima og erlendis, meðal annars í Ungverjalandi, Frakklandi,
Austurríki og Ítalíu. Hann hefur einnig þrisvar tekið þátt í þjóðlagahátíðinni
á Siglufirði.
Jóhann Friðgeir Valdimarsson hefur alla tíð frá því að hann hóf sitt söngnám verið í Bústaðakirkjukór
og sungið með Kammerkór Bústaðakirkju við ýmsar kirkjulegar athafnir og víðar. Hann
er fæddur í Reykjavík, ungur hóf hann tónlistarnám og lærði á píanó og trompet
bæði í Tónmenntaskólanum og Tónlistarskólanum í Reykjavík.
Söngferil sinn hóf hann árið 1995 í Söngskólanum í Reykjavík hjá Garðari
Cortes. Kennarar hans voru síðan Magnús Jónsson, Bergþór Pálsson og Þuríður
Pálsdóttir sem hann lauk hjá 8. stigs prófi með hæstu einkunn vorið 1998. Í
söngskólanum voru Iwona Jagla, Hólmfríður Sigurðardóttir og Ólafur Vignir
Albertsson undirleikarar hans, en Ólafur Vignir hefur síðan verið hans
aðalundirleikari hér á landi. Sama ár fór hann til þriggja ára náms í Mílanó
hjá prófessor Giovanna Canetti, yfirkennara hjá Conservatori Giuseppi Verdi.
Hann sótti líka einkatíma hjá M. Angelo Bertacchi í Modena og M. Franco Ghitti
í Brescia. Jóhann Friðgeir hefur sungið fjölda einsöngstónleika á Íslandi og
meginlandi Evrópu þar sem hann hefur ávallt fengið framúrskarandi viðtökur og
dóma. Jóhann Friðgeir hefur gefið út þrjá hljómdiska frá árunum 2001, 2002 og
2006. Jóhann Friðgeir var fastráðinn við Íslensku óperuna frá ágúst 2002 í eitt
ár. Undanfarið hefur hann sungið mörg aðalhlutverk úr óperuheiminum í Evrópu,
Bandaríkjunum og hér heima, en þeirra á meðal eru;
G.Verdi: Alfredo úr La Traviata, Macduff úr Macbeth, Radames úr Aida og Ismaele
úr Nabucco. G.Puccini: Cavaradossi úr Toscu, Pinkerton úr Madama Butterfly.
Bizet: Don José úr Carmen. Shostakovich: Sinowi úr Lady Macbeth of
Mtsensk. Mossorgsky: Dmitri/Grigorij úr Boris Godunov. Canio úr Pagliacci
eftir R. Leoncavallo og Turiddu úr Cavalleria Rusticana eftir P.
Mascagni ásamt fjölda sálumessa. Hér heima hefur Jóhann Friðgeir hefur sungið
einsöng við ýmis tækifæri t.d. með Karlakórnum Fóstbræðrum, Karlakór
Reykjavíkur, Skagfirsku söngsveitinni, Móttettukór Hallgrímskirkju, Samkór
Kópavogs, Léttsveit Reykjavíkur, Kvennakór Hafnarfjarðar, Kvennakór
Reykjavíkur, Óperukór Hafnarfjarðar og Reykjavíkur, Sinfóníuhljómsveit Íslands,
Sinfóníuhljómsveit Norðurlands, Tangósveit lýðveldisins, Tríói Reykjavíkur og
mörgum fleirum.
Í dag er Jóhann
Friðgeir búsettur á Íslandi ásamt eiginkonu sinni og þremur börnum.
Svanur
Valgeirsson tenór hefur sungið með Kammerkór Bústaðakirkju frá
árinu 1991 við kirkjulegar athafnir og hefur komið fram sem einsöngvari með
hópnumog víðar auk þess að syngja með kvartett innan hópsins við brúðkaup og á
mannamótum ýmiskonar. Svanur var um tveggja ára skeið nemandi Jóhönnu Linnet í
Tónlistarskóla FÍH og í eitt ár hjá Sverri Guðjóns í Nýja tónlistarskólanum.
Hefur þar að auki verið í einkatímum hjá nokkrum söngkennurum; er núna í
söngtímum hjá Guðrúnu Jóhönnu Jónsdóttur. Svanur hefur gaman að flestum
tegundum tónlistar.
Þorsteinn
Freyr Sigurðsson tenór er fæddur árið 1984 á Siglufirði og er þar upp alinn. Hann hóf
söngnám í Reykjavík árið 2005 hjá Elísabetu Erlingsdóttir í Tónlistarskóla
Reykjavíkur og því næst við Listaháskólann árið 2007 einnig hjá Elísabetu
Erlingdóttir. Þorsteinn hefur sótt ýmis masterclass námskeið og ýmsa einkatíma,
eftirtaldir eru t.d. Krisján Jóhannson, Martha Sharp frá Mozarteum Salzburgh,
Prófessor Harald Bjorköy við Griegakademíuna í Bergen, Gunnar Forshuvud frá
tónlistar-akademiunni í Gautaborg o.s.frv.
Þorsteinn hefur tekið þátt í óperstúdíói í íslensku óperunni í tvö
skipti.
Cosi fan tutti haustið 2008 og þar á undan Nótt í Feneyjum árið 2006, þar
sem hann fór með hlutverk Barbaruchio. Síðasta árið 2008 hefur þorsteinn verið
í kór íslensku óperunnar og tók þátt í uppsetningunum á Pagliacci og Cavalleria
Rusticana. Þorsteinn hefur verið virkur meðlimur í Bústaðakirkjukór síðan
haustið 2007 og er einnig meðlimur í kammerkórnum og hefur sungið í
útfararkórnum ásamt einstaka einsöngs í athöfnum, tónleikum og veislum. Einnig
hefur Þorsteinn sungið á ýmsum tónleikum þ.á.m.á Siglufirði ásamt Hlöðve
Sigurðsyni "stóra bróðir" og Þórunni Marínósdóttur konu hans.