Messur sunnudaginn 4. maí

28.4.2014

Messur sunnudaginn 4. maí

 

Barnamessa klukkan 11:00

Lífleg og gefandi samvera fyrir alla fjölskylduna.

Fræðsla söngur og lofgjörð.

 

Guðsþjónusta kl. 14:00

Félagar úr kór Bústaðakirkju leiða sönginn undir stjórn Jónasar Þóris.

Þetta er 2.. sunnudagur eftir páska og litur messuklæða er hvítur.

Gídeon félagar kynna starf og markmið Gídeonfélagsins

Ræðumaður er Gunnar Sigurðsson, nýkjörinn formaður sóknarnefndar Bústaðasóknar.

Messuþjónar aðstoða og prestur er sr. Pálmi Matthíasson.

Molasopi og hressing eftir messu.

Allir hjartanlega velkomnir.

 

Fyrri ritningarlestur er úr Esekíel 34. kafla versum 11-16 og 31. vers

Því að svo segir Drottinn Guð: Nú ætla ég sjálfur að leita sauða minna og líta eftir þeim. Eins og hirðir lítur eftir hjörð sinni þegar hún er á dreif í kringum hann mun ég fylgjast með mínu fé. Ég mun bjarga sauðum mínum frá öllum þeim stöðum sem þeir dreifðust til á hinum dimma og drungalega degi. Ég mun leiða þá burt frá þjóðunum, safna þeim saman úr löndunum og leiða þá heim til síns eigin lands. Ég mun halda þeim í haga á fjöllum Ísraels, í daladrögum og á hverju byggðu bóli í landinu. Ég mun sjálfur halda þeim til beitar í góðu haglendi, beitiland þeirra verður á háfjöllum Ísraels. Þar munu þeir leggjast og ganga í frjósömu haglendi á fjöllum Ísraels. Ég mun sjálfur halda fé mínu til beitar og sjá því fyrir hvíldarstað, segir Drottinn Guð. Ég mun leita þess sem villist og sækja hið hrakta, binda um hið limlesta og styrkja hið veikburða. Ég mun gæta hins feita og þróttmikla og halda því í haga eins og rétt er.

Þið eruð hjörð mín sem ég held í haga. Ég er Guð ykkar, segir Drottinn Guð.

Þannig hljóðar hið heilaga orð

Síðari ritningarlestur er úr 1. Pétursbréfi 2. kafla versum 21 –25

Þetta er köllun ykkar. Því að Kristur leið einnig fyrir ykkur og lét ykkur eftir fyrirmynd til þess að þið skylduð feta í fótspor hans. „Hann drýgði ekki synd og svik voru ekki fundin í munni hans.“ Hann svaraði ekki með illmælum er honum var illmælt og hótaði eigi er hann leið, heldur fól það honum á vald sem dæmir réttvíslega. Hann bar sjálfur syndir okkar á líkama sínum upp á tréð, til þess að við skyldum deyja frá syndunum og lifa réttlætinu. Fyrir hans benjar eruð þið læknuð. Þið voruð sem villuráfandi sauðir en nú hafið þið snúið ykkur til hans sem er hirðir og biskup sálna ykkar.

Þannig hljóðar hið heilaga orð

 

Guðspjall dagsins er úr Jóhannesi 10. kafla versum 11-16

Guðspjall: Jóh 10.11-16
Ég er góði hirðirinn. Góði hirðirinn leggur líf sitt í sölurnar fyrir sauðina. Sá sem er leigður og hvorki er hirðir né á sauðina, hann flýr og yfirgefur sauðina þegar hann sér úlfinn koma og úlfurinn hremmir þá og tvístrar þeim. Enda gætir hann sauðanna aðeins fyrir borgun og er ekkert annt um þá. Ég er góði hirðirinn og þekki mína og mínir þekkja mig eins og faðirinn þekkir mig og ég þekki föðurinn. Ég legg líf mitt í sölurnar fyrir sauðina. Ég á líka aðra sauði sem eru ekki úr þessu sauðabyrgi. Þá ber mér einnig að leiða, þeir munu heyra raust mína. Og það verður ein hjörð, einn hirðir.

Þannig hljóðar hið heilaga guðspjall